հանգստության մասին

Նստեցի պապայի մեքենան
Ես`
Ճամփի կեսից,
Բուրում էր հոտը
Նրա
Ալկոհոլի,
Մեքենայի
Ու անցյալի:
Այդ ամենն ինձ այնքան թանկ էր.
Անասելի:
Պատուհանը չբացեցի,
Մնացի այդ տաքության մեջ,
Թող ձեռքերս մի քիչ կակղվի,
Հենեմ վիզս աթոռին`
Մկանները լարումից մեկնվի,
Գոնե մինչև էնքան,
Ինչքան` նրա մեքենայի վառելիքը կձգի

՞ -ի մասին

Ասում ա`
Արի, գնանք դուրս:
Բայց բաժակը սեղանի,
Որից տաք գոլորշին բարձրանում ա`
Ներկելով նրա դեմքը մշուշությամբ,
Ինձ կասկածելու տեղ ա տալիս:
Միգուցե ճիշտը էն ա,
Որ ես մնամ
… Կամ ես գնամ,
Ինքը` մնա՞

հաղթողի մասին

Սենյակում
Ցուցամատդ քունքին
Օղակաձև պտույտներով
Ազատումի փորձ
Բոլոր շահախնդիր
Ատրիբուտներից
Թե կարող ես
Հաղթիր
Սենյակին

սիրո մասին

        Ալիքազան իմ հոգին
         Ծածանվում է
         Արբեցումից`
         Հողմվում է

Սպիտակ մաշկիդ վրա
Տոտիկ տոտիկ
Շրթունքներով
Հետքեր թողնեմ
Կարծես ծիտիկ
Ձմռանը` ձյունին

ն.-ի մտքերի մասին

(conversation with  n.)
Երբեմն
Երբ պարապությունը ժանգոտել ա փոփոխության սպասումից
Երբ անիմաստությունը կաթում ա թթվահամությամբ երկնքից
Երբ անէլանելիությունը պտտացնում ա մատին աշխարհին
Ես մտածում եմ
Ոչ աստվածների, ոչ աշխարհների
Ոչ անելիքների, ոչ էլ` յարերի մասին
Այլ, թե ինչու հենց հիմա չկտրել կյանքը
Դադարեցնել ցուցափայտի փոքրիկ ժեստով
Կյանքի սիմֆոնիկ նվագը

Տպագրվել է «Գրեթերթ», 2011, թիվ 4